реклама
реклама


Дорога


Юлія Палеская,

Ганцаўчане б’юць трывогу: на дарогах Ганцаўшчыны з’яўляюцца правалы асфальту і ўтвараюць небяспеку. Прычыны гэтай з’явы невядомыя. Камунальнікі засыпаюць пяском ямы на дарогах, а гараджане наконт іх выказваюць самыя розныя здагадкі.

Фото: Ганцавіцкі Час
Фото: Ганцавіцкі Час

На мінулым тыдні на гарачую лінію "ГЧ" тэлефанавалі гараджане, якія выказвалі занепакоенасць з’яўленнем новых ям на гарадскіх дарогах. Хваляванні гараджан узмацняюцца, таму што камунальнікі не гавораць, па якой прычыне ўзнікаюць правалы на дарозе.

Ірына Дзенісеня расказала, што на завулку Школьным на праезнай частцы праваліўся асфальт. Паблізу дарога ўвогуле з кожным разам звужаецца, бо асфальт абвальваецца ў канаву.

Па словах жанчыны, на гэтую "дробязь" (так выказваюцца некаторыя людзі аб правалах на дарозе) многія не звяртаюць увагі. Абышлі ці аб’ехалі сабе дый годзе. Ганцаўчанка ж Ірына Валер’еўна бачыць у гэтым вялікую небяспеку.

"Гэта днём яму можна ўбачыць і абысці яе. А што рабіць вечарам? Асвятленне там дрэннае. Зараз пачне рана цямнець. Дзеці, якія вучацца ў другую змену, дахаты будуць вяртацца ўжо зацемна. Таму гэтая маленькая яма можа нарабіць вялікай бяды. Не дай божа трапіць туды! У выніку можна пакалечыцца на ўсё жыццё", – непакоіцца ганцаўчанка.

Дарэчы, такая праблема ў горадзе не адзіная. Правалы сустракаюцца ў розных частках райцэнтра. Яшчэ адна такая яма ўтварылася каля дома № 21 па вуліцы Завадской.

Па словах адной жыхаркі гэтай вуліцы, асфальт на дарозе праваліўся каля каналізацыйнага люка. І гэта, як лічаць некаторыя жыхары горада, не выпадковасць.

Гараджане дапускаюць розныя меркаванні наконт ям на дарогах. Адны да гэтага адносяцца з гумарам, а другія "правальнымі" з’явамі вельмі напалоханы.

"Хутчэй за ўсё, каналізацыйныя трубы працякаюць. Вада шукае сабе новыя шляхі і вымывае пясок. Вынік гэтага – правалы на дарозе. А можа, наш горад увогуле хутка пойдзе пад зямлю?" – хвалюецца Надзея Рабцэвіч.

Дзве такія ямы камунгаснікі нядаўна засыпалі на вуліцах Мантажнікаў і Будаўнікоў. Чаму ўзнікаюць правалы на дарогах і што будзе прадпрымаць камунгас, карэспандэнт "ГЧ" запыталася ў дырэктара КУМПП ЖКХ "Ганцавіцкага РЖКХ" Аляксея Галяка.

Сітуацыю Аляксей Фёдаравіч пракаменціраваў так: "Прычына ўзнікнення ям пакуль не вядома. У бліжэйшы час мы разгледзім гэта пытанне".